用兵敗如山倒形容水晶宮就最貼切，呢間倫敦球會近況急轉直下，射手摩利臣陷入球荒，會方講到明暫時唔同領隊禾諾克續新約，士氣同狀態都正值低點，今晚造訪主場硬淨布里斯托城可謂毫無爭勝本錢，布城讓平半必捧「上盤」！（now898台、無收費電視998台及廣東體育周二凌晨3:45直播） 水晶宮早排風頭一時無兩，連續十五場聯賽不敗，可惜自從一月底輸畀李斯特城之後就洩晒氣，近四場波一和三負，上仗主場對住出晒名作客水皮葉士域治都輸得，睇得出水晶宮班球員已經散晒。
 水晶宮士氣低沉
首席射手摩利臣連續四仗食白果，佢同埋門將史巴朗尼、守將赫德臣季尾就約滿，到依家都未續新約，前途係點都唔知又點會踢到好波？最弊係會方竟然以戰績不佳為由，暫時唔同領隊禾諾克傾續約，搞到成隊水晶宮士氣都麻麻。 布里斯托城雖然係升班隊伍，但今季戰績並唔失禮，暫時以五十七分穩守聯賽榜第三位，誇張講爭冠軍都有機會。李爾查度自從十月開始冇波入，不過佢勝在入球分布點廣，前面老將拜菲特入到波，連中場奧亞都做到，根本唔愁鋒力問題。 再講，布城今季主場十六戰贏十場，只要今晚贏波，就可以升上聯賽榜榜首，小讓平半博佢份鬥志都抵啦！ | 
