英超「超級星期日」頭場大戰「雙紅會」利物浦主場迎戰曼聯，若論球星魅力，擁有「2R」曼聯應係較佳一方；不過講到陣容變化同攻門瓣數之多，紅軍明顯勝一籌，利物浦歐聯神奇出線後士氣同信心正處勇點，主場亦夠惡，平手盤阿古對紅軍投下信心一票。（now 632周日晚9時30分直播） 歐聯不可思議大爆發
每個球員潛力都有無窮可塑性，利物浦球員質素甚高，在歐聯非勝不可壓力下終於爆發出，自十一月八球大炒比錫達斯開始，紅軍都以驚人攻力同壓迫力戰勝對手，主場四比一大炒防守力強波圖，以及上周中作客狂數馬賽四球，其攻力同表現都簡直不可思議，至於作客馬賽前聯賽一比三不敵雷丁，只係球隊留力之故，並非水準下降，對球隊銳氣絲毫無損。 利物浦由賓尼迪斯入主至今，球隊均以陣容戰術靈活多變見稱，其輪換制令球隊每仗保持強大活力，而隊長謝拉特係狀態最弗一人，近七仗場場有「士哥」，幾位前鋒費蘭度托利斯、古積特、高治同後備賴恩巴布輪流發威，呢批球員可以用好多不同方法入波，令對手可謂擋無可擋，今場仲有沙比阿朗素傷愈候命，後備力量更加強大。 曼聯進攻太倚重２Ｒ
曼聯現時與榜首阿仙奴僅差一分，佢當然恨贏，不過紅魔鬼有個致命弱點，就係球隊踢法太個人化，亦唔夠多元化，「2R」C朗同朗尼表現好壞直接影響戰績，而球隊進攻亦靠小組推進，容易畀對手捉路同防範，上月底作客輸畀保頓，就係輸在呢個因素，當進攻唔順利，就成隊波企晒度，冇晒辦法。 紅軍就唔會有呢個問題，佢有至少五至六套進攻戰術，人腳亦充裕，今場就算曼聯入波先，阿古都唔擔心紅軍追唔番，不過當主場利物浦領先，曼聯就會更難踢，所以平手盤計，點都係捧紅軍有數。
| 
