歐國盃外圍賽又殺到埋身，當中出現多場強弱懸殊賽事，但英格蘭、西班牙等勁旅讓得太辣，當中充滿兇險，不如轉玩大細好過。拿仁今日推介兩場B組賽事，意大利主場撼蘇格蘭，藍軍受制於客軍緊身攔截難大勝；烏克蘭舒夫真高上陣成疑，立陶宛硬淨唔易失波，兩場吼細穩陣。 現時B組形勢緊湊，蘇格蘭、法國同得十二分，烏克蘭九分，意大利只得七分排第四，如果意大利今場都唔贏，非常大件事。 意大利上個賽日輪空，主場鬥蘇格蘭（周四凌晨2時50分開賽）戰意不成疑問，但鄧納東尼當主帥後意軍暮氣沉沉，今仗必陷苦戰。托迪繼續缺陣，前線僅得東尼可靠，而中場主力派路、加度素狀態低迷，柏路達更有傷在身上陣成疑，縱有主場之利亦不宜過分睇好。意大利一向守強於攻，缺乏撕破死守球隊防線能力，蘇格蘭剛擊敗格魯吉亞士氣如虹，而作客更肯定擺出鐵桶陣，加上球隊硬淨到暈，波到人到食住對手，意軍實力雖然秤先，但入波唔慌多；而客軍亦缺乏攻力，今場吼細盤係不二之選。 舒夫真高上陣成疑
另一場烏克蘭主場鬥立陶宛（周三晚11時開賽），形勢同意國一場非常相似。烏克蘭攻擊泉源舒夫真高，上仗鬥法羅群島因傷未有披甲，呢場亦上陣成疑，就算佢勉強出場，狀態未十足都好難惡得出樣。烏克蘭踢法無疑夠機動，但前場缺乏細膩組織，立陶宛後防夠晒硬淨，根本唔驚高Q大棍踢法。其實兩軍都係踢同一家波，烏克蘭係贏都係小勝格，立陶宛攻力歐洲三流，夾埋要入到三球難矣。
| 
