加納近六場比賽有四勝兩和，驟眼睇好似好勁，其實不過係虛火！事關當中對手都唔算係一級強隊，今晚熱身賽中立場瑞典斯德哥爾摩對住巴西，未必可以再惡得出樣，而且包括朗拿甸奴及卡卡在內巴西前場組合撻晒，有力大炒加納，「讓球主勝」可追！（泰星U35台及廣東電視體育頻道周三凌晨1:30直播）
自從德國世盃後，加納近六場熱身賽有四勝兩和，不過當中對手無論係有份踢世盃多哥、日本、南韓及澳洲，抑或尼日利亞及奧地利實力都只係二線或以下，又點樣同巴西比呢？此外，加納兩大鋼鏟艾辛及艾比亞早前已經因傷退隊，中場截擊力進一步下跌，仲點頂得住森巴軍團來犯？
加納正選門將受傷
除中場戰鬥力減弱，加納仲有門將艾積幾日前對奧地利一仗傷出，今場波可能由另一門將京遜頂上，要知道球隊上年世盃十六強三球不敵巴西一役，正正係由京遜負責把關，今晚若然再遇，心理上已經先輸一仗，仲點叫人對加納後防線有信心！ 至於巴西先大勝智利四比○，其中「細哨」朗拿甸奴除打破近兩年國家隊入球荒外，仲連建兩功。佢加上卡卡、費特同羅賓奴中前場組合大獲好評，仲被傳媒冠以新夢幻四重奏，相信領隊鄧加會食過翻尋味再以原班人馬出戰，新四重奏有望加納後防再次演奏，大勝？冇問題！
| 
