今晚上演西班牙盃四強次回合獨腳戲，西維爾主場對拉科魯尼亞，嘉輝大膽取客勝！西維爾首回合領先三比○，絕大優勢下輸兩粒都冇所謂，戰意肯定有保留，而球隊亦需要讓征戰頻頻主力休息，一於博拉科尾彩，贏波出局！（有線足球台61周四凌晨3時直播）
由於西維爾有三球在手，今場實在毋須再搏命，所以馬會亦唔敢開「讓球主客和」，證明連莊家都對主隊有顧忌。西維爾上周中於足協盃四強次回合擊敗奧沙辛拿打入決賽，及後聯賽作客惡戰皇家馬德里，全場搏足下輸二比三，聯賽二哥位不保，體力付出不在話下，更有損大軍士氣。
其實自二月開始，西維爾平均一周要應付兩場波，上個月更打足九場，兼且場場都係搏命大戰，現時球隊疲兵滿營，緊仲要應付聯賽對維爾瓦及足協盃決賽大戰愛斯賓奴，故今場西班牙盃對拉科絕對係回氣大好機會，冇理由仲走去搏命！
練卡柏路斯要挽面子
拉科今仗拚輸打，照計係要焗攻，但該隊練卡柏路斯係防守大師，作客唔會胡亂搶攻，嘉輝相信佢仍然會以擅長穩守突擊伺機偷襲，就算贏唔番都唔想再輸，皆因拉科於首循環聯賽作客西維爾已吞四蛋，搞到卡柏路斯舊東家球迷面前冇晒面，今場難得西維爾有機會放軟手腳，卡柏路斯唔會再咁失威，幾大都想番個彩！
