踢波最緊要有信心，史浩克04今晚德甲主場迎戰杜伊斯堡，「讓球主勝」要吼實，原因係史浩克上星期創歷史殺入歐聯八強，門將紐亞、中場拿傑迪錫又分別被大會睇中，全隊信心大增，對家杜伊斯堡長期護級，就連前鋒艾列頓都冇癮離隊，士氣差到爆要唔過！（有線62周六凌晨3:30直播）
目前史浩克聯賽落後榜首拜仁十二分，原本德國傳媒估計，練史隆卡好快會被辭退，點知呢個時候，史浩克發威歐聯淘汰波圖，歷史性殺入八強，難得球員信心返晒，照道理史隆卡冇可能唔食住上，吩咐球員主場打沉杜伊斯堡，保住自己個金飯碗。
雖然史浩克近期火力下降，但門將紐亞就有「上身」演出，先後面對拜仁、波圖都有出色表現，佢甚至得到巴塞隆拿賞識，中場拿傑迪錫就成為祖雲達斯獵物，下季有可能轉投意甲搵大錢，加上中場費比恩安斯、右閘拿菲爾分別停賽後復出，呢場史浩克能夠排出最強陣容應戰，點都值得睇高。
艾列頓過檔當尼斯克
杜伊斯堡升班後幾乎未好過，暫時得五勝三和十五負排聯賽榜尾二，後防舒歷基拉傷肌肉缺陣可以話係雪上加霜，最慘係艾列頓知道隊波唔掂，寧願上個月轉投烏克蘭球隊當尼斯克，都唔想陪埋杜伊斯堡降班，其他球員有咩諗法，真係不敢想像，足球場係英雄地，冇信心一定會輸，照睇杜伊斯堡都係難逃劫數。
