咸爺百場慶典，邊個敢唔畀面？法國今晚巴黎主場迎戰英格蘭，上演重量級熱身賽，英國傳媒預計，碧咸會第一百次為英格蘭國家隊上陣，對家法國即刻「響應」呢個畀面派對，起碼半打球員聲稱受傷退隊，實行讓路畀咸爺威，唔似讓得起平半，博下盤！（now634台、廣東體育周四凌晨4:00直播）
 消息指英格蘭曼聯前鋒朗尼、車路士中場林柏特有傷，但領隊卡比路最叻鐵腕統治，就連奧雲都夠膽唔用，相信佢唔敢用輕傷做理由，立亂流攤避戰。更何況呢場係碧咸第一百次為英格蘭上陣，全世界都睇住呢場波，群星拱照萬人迷，唔似會輸波掃興，唔好忘記咸爺最識搶風頭，呢鋪佢隨時又用罰球建功！ 亨利賓施馬韋拉退隊
睇番卡比路領軍首戰對瑞士，佢排出四五一穩守陣式，明顯係想強化中場力量，再加上泰利復出鎮守後防，呢場即使唔贏都唔容易被攻破，何況法國近七場得兩勝三和兩負，當中只係贏過法羅群島同立陶宛，狀態差得好緊要，卡比路出名係戰術大師，有佢睇住，英格蘭唔會輸得咁易。 另一方面，法國領隊杜明歷沉醉往昔光輝，堅持重用一班過氣球星，馬基列尼、杜林仲係國家隊骨幹，認真命！最慘係班球員唔聽佢支笛，賽前亨利、沙夏、賓施馬、韋拉、華布拿、沙格拿、費爾都聲稱有傷申請退隊，寧願「讓路」畀英格蘭幫碧咸威，根本冇心為杜明歷搏命，咁情況點讓平半？
| 
