○六年世界盃決賽翻版大戰，今晚搬到歐國盃死亡C組進行生死一戰，法國同意大利兩班波為出線基本上都係非勝不可，可惜大家都唔最佳狀態，想贏波都有心無力，今仗開和機會濃。最終邊隊出線，都真係要聽天由命囉！（now632台、廣東體育及中央5台周三凌晨2:45直播）
悶和羅馬尼亞，再慘敗荷蘭腳下，踏入「後施丹年代」法國，首次出戰大賽，畀人感覺就係冇進攻靈魂，再加上射手亨利狀態唔算突出，就算話今仗會有中場韋拉復出，但睇落都好難贏得出喎！
加拿斯負傷紮住上
形勢上對法國最不利，因為就算佢同意大利和波，加埋羅馬尼亞輸波，佢都會因為三隊對賽得球唔及意大利，宣布出局。焗住求勝，鬥志夠強係佢搶分本錢，但係由老臣子亨利，到中生代列貝利，又或者係新星賓施馬，都冇個踢得出水準，法國鋒線實在都係靠唔住。
門將哥柏透露大軍賽前已經翻睇首兩場分組賽錄影帶，商討球隊漏洞缺點，對今仗改善表現相信會有大幫助，只係防線老化問題實在嚴重，加拿斯練波又話有傷在身，就算加多個韋拉中場頂住，睇怕好難做到滴水不進。
Euro2008分組賽賽制
分組賽共分4組，每組4隊作賽，前兩名球隊將進身半準決賽淘汰階段賽事。小組各隊將會依據下列準則排名：A總得分 ；B對賽成績 ；C對賽球差 ；D對賽入球數字； E得失球差； F得球數字；G若兩支球隊完成最後一場分組賽後，出現同分、同得失球數字，會於該場分組賽後互射12碼分勝負，決定最後小組排名。但如果同組2隊以上球隊同分，排名則按上述1至6項決定小組名次。
兩隊唔似有力3分
大家實力相當，近兩年三次交手就和兩次，信數據，今晚和波有乜咁出奇？加上大家之前兩場發揮都唔算突出，攻不銳加上守不穩，冇晒強隊風範，兩邊都唔似有能力到三分，3.55倍和抵博！
| 加入收藏：
责任编辑： 文章作者：