世界盃南美洲區外圍賽大戰，巴西主場迎戰阿根廷，上仗兩隊同樣失分，演出備受批評，今場大家都想贏波翻身，巴西缺少卡卡同朗拿甸奴，嚴重缺乏創造力，冇乜贏波本錢，點讓得起阿根廷平半，一於揀番下盤！（有線足球台61周四早上８時50分直播）
巴西上場作客不敵巴拉圭，唔見招牌短傳入滲，成場冇乜威脅對手大門，毫無森巴足球味道，難怪被傳媒狠批為「近年最醜陋的巴西」。冇卡卡同「細哨」，大軍中前場組織力大減，迪亞高難擔大旗，羅賓奴弗足全季，但近態稍有回落，導致球隊冇乜鋒力。前面唔掂，後面仲衰，上場如非對手兩度中柱，球隊已淨輸四粒，中堅組合盧斯奧同祖安繼續不穩，防線震過貓王！
阿根廷齊腳攻力有保證
至於阿根廷方面，上場球隊主場苦戰逼和厄瓜多爾，跌到一地眼鏡碎。賽後傳媒矛頭直指中場大腦列基美，話佢夢遊球場冇態，頭巴斯利仍然撐佢，呢點值得商榷。不過，球隊勝在齊腳過對手，前線美斯同阿古路都有級數，若果巴西谷得太上，呢兩隻老鼠仔實搵到數，加埋上仗後備入替建奇功柏拉斯奧，球隊攻擊瓣數多過對手，只要發揮正常，可望保持不敗。
順手睇埋往績，巴西對上三次對住阿根廷贏晒，三場都贏三粒，似乎完全食住對手，不過，依家兩隊人腳唔同晒，森巴大軍已淪為攻不銳、守不穩，呢場大家打真軍，阿根廷絕對唔輸蝕，下盤有計！ | 
