歐國盃四強一觸即發，德國、土耳其「六年塵事再翻新」！兩軍○二韓日世界盃中打入四強，不過德國晉級決賽，土耳其就打季軍賽，當年無緣決賽，估唔到六年後終有機會。相信唔少人都希望土耳其可步希臘後塵，再爆驚天冷門奪標，但Peter就唔係咁睇，德國捧盃欲望極飢渴，今場冇得爆冷喇！
足足十二年，日耳曼兵團都未染指過大賽冠軍，所以今次歐國盃，佢唔容許出現絲毫閃失。包括今晚四強戰，德國睇見克羅地亞咁樣出局，肯定有所警惕，土耳其要再爆冷唔易，加上球隊人腳唔齊，尼赫治、端基等主力全部唔出得，面對實力雄厚德國，應該都要俯首稱臣。
防守先係王道
而德國高空攻勢威力無比，土耳其幾場比賽中，防守兩邊出波時都頗為吃力，所以或成勝負關鍵。所以Peter向大家強烈推介德國主勝及上盤，只要德國早入波，或會出現大波膽添。
睇完歐國盃八強賽事，Peter想在此作個小總結，就係出線球隊要具備三大元素，就係有好練、球員有狀態及上佳防守！Peter成日講，好防守就係贏波關鍵，正如大踢悅目足球西班牙，面對意大利都以防守為先，因為阿拉干利斯知道，意軍「死守」之餘亦會反擊，稍為減低防守意識，就會一失足成千古恨，所以防守現代足球係好重要。 | 
