世界盃亞洲區外圍賽第一組兩戰仍未嘗一勝中國，今晚作客卡塔爾為求保住出線機會，肯定會搏盡，安高都睇好佢至少可以唔輸。事實上，中國隊練福拉多賽前已經積極安排鍛煉死球戰術去攻打主隊，有齊部署同決心，受讓平半，下盤博得過。（廣東體育周二凌晨0:00直播）
小組兩戰只得兩分，中國出線形勢陷於被動，加上日前國際足協宣布解除對伊拉克禁賽令，中國想四隊之中搶到首或次名出線，今仗自然不容有失。為到好成績，中國大軍早上周四已經飛抵卡塔爾備戰，以便適應高達四十度高溫，經過連日來訓練，又使成四萬幾蚊，買埋十五件冷氣背心，準備畀班正選開波前、半場休息陣爽，保存體力，臨場可望有更好發揮。
講到行兵布陣，賽前有國內傳媒透露中國將可能由「442」改成「352」出賽，前鋒線仍會以韓鵬及朱挺掛帥，中場當然有鄭智領導攻守，最特別只是在防線上將大賽經驗豐富「雙槍將」孫繼海由右路移去左路，填補狀態不足孫祥左翼空缺，期望能穩守之中，靠反擊同死球戰術攻陷對手。
卡塔爾鋒將增援失敗
就正如中國練團所講，佢身高同處理罰球上，面對住卡塔爾都會有優勢，咪嫌佢進攻瓣數獨沽一味，正所謂橋唔怕舊，最緊要受嘛！頂入你卡塔爾一粒，要守到尾又有幾難？
主隊方面，最大打擊肯定係剛剛入籍巴西前鋒馬斯奧艾馬遜，被亞洲足協禁止上陣，加唔到呢把煞食尖刀，其餘「外籍軍團」威力亦會打折扣。安高仲知道卡塔爾近排安排特訂體能訓練谷狀態，不過中國隊不嬲係怕技術型球隊多過體力型，鬥衝鬥跑，又點會驚你！
| 加入收藏：
责任编辑： 文章作者：