|
|
| ||
|
周末依然係韓職主要賽期，全日共有五場開盤，心水係城南一和主場對光州尚武。城南一和現時排行第二位，暫時聯賽只輸過一場畀死敵浦項制鐵，表現極之穩定。對手光州尚武已經好耐未贏過，球員輸到慌失失，今場依然唔睇好，「主勝」應可順利開出。（周六下午６時開賽） 城南一和近況唔錯，連同聯賽及盃賽已經四連勝，贏得最精彩可算係六月尾韓聯盃主場對ＦＣ大邱。當日一和雖然上半場落後一比二，但下半場突然個大反擊，終以四比三反勝對手。呢場勝利帶出兩個要點，第一係一和主場發揮出色，第二係呢班球員鬥心十足。而盃賽勝利對一和幫助好大，上仗聯賽佢再對大邱，更輕取對手四比一。主隊球員無論士氣及狀態都處於高位，當然值得追捧。 尚武射手啞火作客曳 光州尚武已有六場未贏過，上輪主場對中游球隊大田市民都要失兩分，今次面對城南一和更難令人信服。而尚武首席射手金明中近期又啞晒火，連續五場聯賽冇波入，城南一和後防今場會踢得輕鬆得多。另方面，尚武作客成績差劣，暫時只得兩和四負，今日對住勇態畢露一和，輸波都好正常。 |
|
