日職重開之後，橫濱水手演出一再令人失望，聯賽連盃賽連輸三場，頭桑原隆備受壓力，盛傳隨時帥位不保，大軍中後場又受停賽問題影響，防守力大大減低，今日主場面對二連勝新潟天鵝，主Ｗ低開1.7倍，只係受名牌效應，計近況捧番兩倍「讓球客勝」好過！（周日下午6時開賽）
水手季初係威係勢，頭四戰贏三場，可惜虛火一過，此後無以為繼，目前已暴跌至榜下游，備受降班威脅。休戰期間球隊人腳冇乜變動，球季重開後狀態每況愈下，先後不敵磐田山葉、大阪飛腳同川崎前鋒，三場入得一球，完全冇火冇力。大軍交唔到成績，頭桑原隆自然要鑊，據日本傳媒報道，會方開始物色新帥，睇佢捱唔到幾耐。
水手士氣麻麻，仲受到傷停問題困擾，隊中兩大守將粟原勇藏同田中裕介均有傷在身，今仗同樣會缺陣，被迫變陣出擊，松田直樹要移後一格同中澤佑二扼守中路，今季佢大部分時間踢防中，同中澤默契肯定差少少。另外，隊長河合龍二今場要停賽，球隊防守力再度削弱，對住天鵝毫無優勢，絕對讓唔起對手，捧番有2倍分頭「讓球客勝」先合理！
市原搶W夠「薩」氣
同日有場護級六分波，聯賽排包尾千葉市原主場迎戰尾二札幌岡薩多，兩軍復戰後同樣未贏過波，近況都係曳，岡薩多中場基爾頓仲要停賽，加上守將坪內秀介及射手安達臣羅拔圖因傷上陣成疑，人腳不整仲要作客，睇難有作為，撐市原主Ｗ好過！
