山長水遠去到南非掘金，雖則係表演性質，但總唔會唔想贏波？曼聯今晚就會進行南非之旅第二戰，硬碰奧蘭多海盜，「紅魔」領隊費格遜賽前話明呢班對手實力差過凱撒酋長，又話會變陣出擊，講到咁有信心省招牌，一於要1.65倍「讓球客勝」啦！（now632台及廣東體育周三凌晨2:10直播）
上周末南非之旅首戰對住凱撒酋長，曼聯派出陣容已經有成半隊係歐聯決賽正選，話佢留力和波，其實講唔通。狀態未足，加入部分新人又令默契減弱，係最終打和原因，之但係我好相信費爵爺吸收過訓，球員又經過多一場比賽熱身後，狀態點都會有改善，今仗應該會有較好發揮。
冇國腳飛海盜未夠班
有記者問過費Sir對住海盜有咩預測，費Sir回應話根據上次出訪南非，海盜實力係酋長之下，咁即係話上仗對酋長和波，今次點都應該贏番鋪啦！我當然唔會話住費格遜一句說話去賭波。事實上，睇番南非國內聯賽成績，海盜又的確酋長之後，上季係聯賽第八位，實力普通。再加上佢過去一年曾經三換練，內部混亂，又冇乜頂級國腳飛，想爆冷自然難上加難。
陣容方面，費格遜話過會作出部分變動，將上陣時間攤分，其中上仗因傷缺陣三名主力包括後里奧費迪南、施維斯達同中場卡域克都會復出，令陣容更加完整，今次要打開南非之旅勝利之門，大勝一場，應該冇問題啦！
