「富豪軍團」車路士亞洲之旅第一擊，今晚會廣東奧林匹克體育中心上演，同東道主FC廣州進行熱身賽。車仔今次東來精銳盡出，新領隊史高拉利（大菲）為省招牌響頭炮，話明會盡遣主力上陣，加上主隊聯賽成績低落影響軍心，試問仲點樣爆冷？車路士雖讓兩球，但2.3倍「讓球客勝」依然捧得過！（now632台及廣東體育周三晚8:00直播）
雖然話周一先抵達廣州，但車仔上下並唔係當度假，至少連續兩日操練，都冇話有邊個大牌球星詐傷扮唔練，踢分隊賽時又個個落力。事實上，又點到車仔班巨星唔搏命先？「大菲」史高拉利話明個個都會有機會爭番個正選位，無論係上季雪櫃兵舒夫真高，又或者邊緣球員胡禮菲臘斯，定係愛將迪高，落到場都肯定會交足貨。
主隊聯賽低沉無謂分心
再者，車仔今次揀選駐紮地星河灣酒店，位置遠離市區，講到底，咪就係車仔高層想班球員可以專心為新球季做好準備囉。當然，球隊開操冇耐，體能、狀況都未算一流，但球員整體質素較主隊高出一大截，要搵三幾個入波應該唔係太難。
主隊方面，目前排中超聯賽榜第八位，表現未如理想，球員接受訪問時都話明想將注意力擺聯賽，多過對車仔場波，有人仲直認最驚呢表演賽受傷添，真係同未打先投降冇乜分別。練沈祥福賽前透露戰術上都係先以防守為主，再打反擊，之不過面對住實力強橫車仔，又邊有咁易守得住！舊年曼聯訪華對住FC廣州輕鬆贏三粒，車仔今鋪睇怕唔難重演歷史！
