話咁快車路士亞洲之行就到最後一站，呢支億萬大軍今晚會吉隆坡沙亞蘭體育場獻技，同馬來西亞隊拍跳。雖然新兵保辛華因傷肯定缺陣，缺態波歷克同舒夫真高又未必落場，但車仔陣容依然星光熠熠，經過近仗友賽後狀態亦提升唔少，對住馬來西亞又係時間派蛋，讓球主客和讓三球照捧1.9倍「客勝」！（now632台周二晚8:45直播）
馬來西亞主將泰特斯缺陣
身在馬國車仔，今夏去大陸同澳門，之後又會遠赴莫斯科，唔少傳媒炮轟會方為錢搞到班球員奔波勞碌，冇覺好。冇錯！球員又?又要適應時差，但領隊史高拉利就話頻密賽程反而幫佢睇清楚隊波。「大菲」講到出口季前熱身賽係考牌試，試問班球星又點會唔搏命？況且車仔已經接連炒FC廣州同FC成都，狀態照計應該愈操愈Fit先係。
主隊馬來西亞上年十月世界盃外圍賽中，首圈就遭巴林淘汰出局。上星期友賽印度結果各一言和，實力亞洲講只屬有限公司。最慘係獲領隊沙菲安拿芬徵召翼鋒泰特斯，因入境問題趕唔切返回馬來西亞，連呢位法甲打滾多年「神童」都冇埋，真係睇唔出馬來西亞有乜本事偷雞！
大菲發表四冠宣言
隨住連續兩場熱身賽都獲得大捷，車路士領隊史高拉利尋日馬來西亞出席記者會時，大膽發表四冠宣言：「新球季車路士會有四條戰線，我會盡我所能取得所有冠軍。雖然聽落難度很大，但依我班底講，絕對有能力做到。」
