英超例牌先由社區盾揭開序幕，今晚會由樸茨茅夫大戰曼聯。為配合全新英超賽季，我ESPN新加坡總部亦都大興土木，換過晒配合高清轉播器材，順便裝修埋辦公室，最搞係朗尼仲成為主角添！
我總部有人將朗尼踢波雄姿張相放大，貼接待處大堂升降機門，結果每日行出行入都睇見朗尼畀人撕開兩邊！我問番負責設計同事點解要放朗尼張相，佢話：「估計呢季輪到朗尼發威！」睇怕佢都係紅魔躉，但記住唔代表我全台立場！
其實尼日利亞感染神秘病毒朗尼呢場唔踢得，加埋C朗、夏格維斯、朴智星亦養緊傷，安達臣參加奧運，家陣曼聯同上季初一樣唔齊腳，結果上季英超開局只得兩和一負，大家仲記唔記得？
樸茨茅夫上季表現穩定，對英超四大豪門八場比賽只輸一次，確係遇強愈強，而且每場平均只失1.05球，搞到強隊都冇晒符。今季買入高治夥拍迪科爾組成一高一矮鋒線搭檔，千祈唔好睇輕佢！今晚社區盾雖則話未必可以低曼聯捧盃，但要九十分鐘內同紅魔踢成均勢都唔係話冇可能！
| 
| 加入收藏：
责任编辑： 文章作者：