正如星爺話齋，歡樂時光總係過得特別快，踢完歐國盃之後，小弟「暑假」只係得個零禮拜咁大把，轉過頭依家已經跌落「無間地獄」，日頭要同奧運作長期戰爭，夜晚又要喪睇熱身賽、為新球季作好準備，好衰唔衰依家仲上埋鋪《家好月圓》癮，真係少精力都唔掂。不過話分兩頭，當三者時間撞埋一齊，點算好？
早兩日聽聞有觀眾投訴，上集正當「蓮子容」為正義放棄金錢痛罵Sa姨、化身師奶偶像同時，第二日竟然因為要播中國女排，搞到《家好月圓》「休息一日」，令一眾唔鍾意睇奧運師奶即時鼓譟，揚言罷睇奧運云云。
10秒唔使飛人梗係要睇
各位球迷千祈唔好笑，事關今日英超開鑼、澳職同德甲又話有直播，阿仙奴（下圖左）對西布朗分分鐘會成為奧運「犧牲品」！先當大家對澳職冇咩興趣，唔介意晏晝讓部電視畀囡囡或者老婆睇黃金寶，不過夜晚都仲有幾項田徑同百米飛人決賽，同阿仙奴、熱刺等英超直播撞到應一應，就當各位球迷有兩部電視，唔使同屋企人爆發「電視爭奪戰」，不過自己會點揀？四年一次奧運飛人決戰？定係成日都有得睇熱刺鬥米堡？我自己就唔使點揀，因為就算到時幾忙都好，點都會停十秒咁多，睇邊個係京奧飛人！
如果呢個世界冇奧運，小弟唔使「擔泥」，大家又唔使揀得咁辛苦，呢個世界可能會變得更美好呢！
| 加入收藏：
责任编辑： 文章作者：