要數英超第一周最對辦球隊，梗係車路士啦！CowBoy覺得車仔新帥史高拉利充分利用每件「零件」特性，加上迪高同保辛華迅速融入，可謂將「進攻足球」發揮至極點，呢場作客防守麻麻韋根，唔難再大勝一場，推介2.15倍「讓球客勝」！（now632台周日晚8:30直播）
有別於莫連奴同格蘭兩位前車仔領隊，經常奉行一比○贏波輸盤政策，車仔新帥「大菲」史高拉利英超處子戰，就話畀大家聽咩叫「進攻足球」。
大菲擅引爆球員威力
其實車仔今季陣容同以往兩位領隊執時變化唔大，何解第一場就可以狂數樸茨茅夫四粒呢？CowBoy覺得史高拉利比「莫、格」更優勝地方，係佢識充分利用車仔每一件「零件」，將每位球員發揮至最大威力，呢點亦係車仔「進攻足球」精髓。
仲要一點CowBoy想提出係，迪高同保辛華迅速融入車仔打法，亦係佢「進攻足球」Run得咁順原因，迪高唔單止冇同林柏特撞位，更緊密連繫車仔攻守，完場前射入世界波更凸顯佢功架，至於右閘保辛華則提高車仔側擊力量，加埋安歷卡同祖高爾等「士哥拿」，我真係搵唔到車仔依家有任何弱點。
韋根後防衰唔集中
至於韋根方面，佢第一場作客同級球隊韋斯咸，居然一開波唔夠十分鐘就失兩粒，最後以一比二落敗，反映球隊後防認真一般，呢場對住大踢進攻足球車路士，又點頂得住全場呀，輸兩粒可以講係最低消費！
| 加入收藏：
责任编辑： 文章作者：