早幾日聽電台講，話好多人奧運完後會產生失落感，最有效方法就係睇波轉移視線，話咁快，歐聯第三圈外圍賽次回合今晚就上演，當中巴塞隆拿將會作客波蘭球隊克拉科夫。雖話巴塞依家四球手，不過新帥哥迪奧拿同前鋒伊度奧都正為飯碗搏命，戰意爆燈，呢場肯定唔會放過克拉科夫，2.15倍「讓球客勝」必捧！（開賽時間：周三凌晨2:45）
老實講，朱楓一開始對之前只係過B隊哥迪奧拿執巴塞真係冇乜信心，但做人就係咁，愈畀人睇死，就愈發奮，哥迪奧拿之前帶領巴塞踢一系列比賽，場場都好似當對手係殺父仇人咁，由第一場炒喜伯年半打開始，到最近一場贏小保加二比一，七場加埋喪入三十一球。
朱楓覺得哥迪奧拿咁做，無非都係想樹立自己威勢，所以就算首回合巴塞主場贏克拉科夫四比○，有理由相信哥迪奧拿今場仍然會吩咐球員盡力去踢，繼續大打進攻足球樹立自己招牌。
克拉科夫輸4粒無心戀戰
仲有一點值得留意，係哥迪奧拿上任時曾經講明會放棄伊度奧，不過呢位前鋒熱身賽卻大打爭氣波，單係近四場波就入七球，難怪哥迪奧拿早前都放風話有意留用番佢。
上岸在即，伊度奧呢場肯定加多兩錢肉緊，再加上希比、施度基達等新兵都要爭表現博哥帥歡心，試問實力平平克拉科夫又點頂得住巴塞強攻？況且克拉科夫輸住四球，就算返到主場都肯定無心戀戰，放軟手腳，輸兩粒可謂最低消費 | 
