唔夠打，咪搵救兵囉！德乙凱沙羅頓上場開咧戰失分收場，明顯成隊波仲未執正，好在練沙錫醒水即刻做，羅致分別力漢堡及賀芬咸中場悉尼森同柏爾積斯，今晚聯賽主場對紐倫堡兩位雷霆救兵壓陣之下，有力贏波，平手盤捧主隊好路！（開賽時間：周二凌晨2:15）
紐倫堡後防存破綻
凱沙羅頓上場對住緬恩斯，先失三球之下最後打成三比三平手，唔多唔少反映練沙錫排錯陣！好似正選箭頭拿傑成場波渾渾噩噩，反而後備入替贊治錫克梅開二度，相信沙錫都會吸取訓，重新起用後者打正選。再加埋從賀芬咸羅致柏爾積斯，以及由漢堡借得悉尼森壓陣，有理由相信球隊今仗有脫胎換骨表現。
何況，紐倫堡亦有暗湧，原因係佢有中堅安達斯禾夫因傷長抖，無論今場派中場柏查杜迪客串，抑或起用後備阿巴東拿度，始終都畀唔到大家信心，面對增援凱沙羅頓輸埋都唔出奇！
| 加入收藏：
责任编辑： 文章作者：