第二屆酋長盃今晚會阿仙奴阿聯酋球場舉行，東道主阿仙奴首仗會接受意甲勁旅祖雲達斯挑戰。兵工廠新「進攻鐵三角」呢排弗到漏，相反祖記射手阿馬利有傷在身，此消彼長，呢鋪當然係玩2倍主勝啦，至少好分過阿仙奴讓平半個上盤（1.78倍）！（now632台及廣東體育周六晚11:15直播）
酋長盃上年由阿仙奴創辦，首屆佢就連贏巴黎聖日耳門同國際米蘭封王，呢個盃賽同阿積士四角賽一樣，每入一球都有一分，鼓勵各隊進攻，開正阿仙奴瓣。
熱身賽兩連勝入13球
事實上，阿仙奴近期熱身賽可謂弗到痹，兩連勝勁入十三球，當中賓特拿、卡路士韋拿同韋舒利呢個新進攻鐵三角兩仗加埋更包辦十二球，加埋拿斯尼、尹佩斯、加拿斯、艾迪巴約等主力上仗對史特加都復出，中場大腦法比加斯亦已歸隊有望上陣，狀態同人腳都有十足保證！
祖記留力歐聯外圍賽
另邊廂祖雲達斯，早前TIM盃對AC米蘭同國際米蘭都能保持不敗，狀態唔錯，不過新買番射手阿馬利卻對國米一役撞穿頭，依家都仲未好得番晒，由於祖記月中將要應付歐聯外圍賽，為免加劇阿馬利傷勢，有理由相信祖記今場唔會畀佢踢足全場，或多或少對鋒力有影響。
最弊係祖記後基亞連尼賽前話球隊需要增兵先有力爭標，似乎暗示隊中有部分球員唔夠班，暗藏不和氣氛，呢場作客阿仙奴絕對唔容易全身而退！
