Mic少睇波咁耐，都未見過一隊咁渣ＡＣ米蘭，今晚熱身賽作客英超二線球隊曼城，平手盤捧主隊，進取直取主Ｗ亦不為過！「紅黑兵團」中前場飽受傷患困擾，主力卡卡、朗拿甸奴、恩沙基、柏圖全部缺陣，之前離譜到畀車仔大炒五粒，佢狀態曳、士氣低，輸多場好正路！（now 632周日凌晨零時15分直播）
身為應屆世界冠軍球會盃得主，ＡＣ今夏毫無勁旅風範，三場熱身賽未贏過兼冇波入，首仗主場悶和克雷莫納○比○，之後不敵西維爾○比一，對車仔仲大敗○比五，實在慘不忍睹。ＡＣ攻擊靈魂卡卡同恩沙基都受傷缺陣，而柏圖同新將朗拿甸奴都要踢奧運，依家只剩番小朋友柏路斯治係正宗前鋒，但練安察洛堤好多時搵岩布仙尼打單箭頭都唔出佢，就睇到呢位小將未夠料。ＡＣ新季冇得踢歐聯，意甲聯賽又較遲開咧，陣中老油條多，遲遲都未上力，今次殘陣鬥曼城，搵你要喇！
曼城開操早上晒力
曼城有他信撐住，今夏大展拳腳，雖然買唔到「細哨」，但都搵到曉士執，而佢簽入賓希姆有一定卡士，再配合原有不俗班底，戰鬥力有保證。曼城今夏要踢足協盃賽事，故球隊比ＡＣ早開操，而且已踢過兩場正式賽事，狀態遠勝對手，佢主場極具威力，上季十九場聯賽僅敗四場，不敗率近八成，今場平手盤可以秤先！
