歐洲各地盃賽好多都未展開，但日聯盃今日已踢到四強首回合，其中清水心跳（下圖）會先主場鬥大阪飛腳。心跳今屆賽事主場無敵，呢鋪對住狀態勁沉飛腳可謂睇住食，平手盤必撐心跳！（開賽時間：周三晚6:00）
雖然心跳暫時聯賽排十四位，深受降班威脅，不過呢班波今屆日聯盃表現卻判若兩隊，唔只分組賽以首名出線，八強更淘汰勁旅鹿島鹿角，當中四場主場全勝勁入十四球，絕對唔講得笑，唔怪得佢講到明想繼九六年之後第二次捧盃。睇番個陣容，心跳今場有中場兵動昭弘停賽，中場藤本淳吾同門將掛川誠仍然養傷，不過新進射手岡崎慎司最近兩場勁入三球，超強火力絕對可以填補人腳不整問題。
飛腳7戰不勝
對手飛腳自從賣走射手巴爾後，成班波跌晒Watt，連續七場不勝，就算今場有洛尼同中場二川孝廣復出，弊在中場大腦遠藤保仁要踢太公波，唔似可及時反彈，要出線？似乎輸少當贏，留番次回合搏殺仲實際！ | 
