韋斯咸頭古比士利盡失人心，帥位危危乎，周中英聯盃佢被主場球迷柴台，隊中守將厄遜不但冇幫口，仲落井下石叫古Sir自我檢討，大軍內部立立亂，今周主場面對布力般流浪難讓波，下盤值得捧場。（now 631周六晚10時直播）
古比士利開咧冇耐即犯眾憎，上仗對住馬爾斯菲，全場畀球迷不斷唱衰，叫佢執包袱走人。守將厄遜並冇怪球迷反應，佢話fans有權表達意見，古比士利成為眾矢之的，自己應該檢討喎，不但唔幫頭減壓，而且仲繼續撥火，似乎佢都唔多妥古Sir，「錘仔幫」內部明顯有問題。 殘兵點讓布力般 韋斯咸英聯盃法定時間同低組別球隊馬爾斯菲打和，加時後先贏四比一，但冇乜說服力，而且體力用多，未必回得切氣。今周大軍續有射手比拿美缺陣，中場主力麥克盧保亦要停賽，大軍人腳唔齊，戰鬥力又要打折扣，對住開咧後未輸過布力般，讓平半信唔過，捧番下盤數！ | 
