德甲兩大「進攻王」利華古遜、賀芬咸今晚對戰，兩隊黑柴眼中都係瘋狂球隊，中前場猛將如雲，場場攻到對手失魂，今晚兩支開咧至今入波同射門次數最多球隊狹路相逢，邊隊贏唔敢講，但係1.68倍入球大係誠意推介。（周六晚９時30分開賽） 賀芬咸青春無敵 先講賀芬咸，老細係身家超過六百億港元德國首富賀普，又搵到前史浩克名帥蘭歷克執。佢近幾年低組別一直致力搞青訓，兩個幾月前完德國十七歲以下青年賽全國冠軍，上仗對慕遜加柏，落場球員年紀最大中堅尼爾遜都只得廿五歲，確係青春無敵。
賀芬咸首戰作客三球大炒科特布斯，上仗雖然只小勝慕遜加柏一球，但上半場領先之後仍然大舉搶攻，下半場機會不計其數，若非客軍門將希美洛夫屢救險球，加埋射中門楣，絕對有機會贏得更多。巴西中場卡路士愛德華度初上德甲已經顯示超班級數，由佢支援大勇箭頭丹巴巴亞同伊比斯域，進攻火力極之強勁。 利華射門冠德甲 講瘋狂，利華古遜比賀芬咸猶有過之，過去兩場聯賽每場有威脅射門次數竟然多達十五次以上，搞到對手門將維丹費拿同列文忙到暈。為博主場開齋，新帥納巴迪亞下令今仗擺全攻型陣式，首次盡用希美斯、基卡斯同傑斯寧三箭頭，加上今季以千萬歐元加盟巴西中場連拿度奧古士圖校炮，實行同賀芬咸大駁火。
不過佢防線傷情嚴重，沙比、辛基域斯、基斯高、卡斯特羅同埋主力門將艾達全部因傷缺陣，正選陣容有前冇後，撞正如日中天少年兵賀芬咸，隨時會炮製一個令人驚喜大比數。黑柴除捧入球大，仲會貪心小敲埋總入球7+同三個其他波膽添 | 
