今晚率先出閘兩隊係烏甸尼斯同巴勒莫，兩隊上季都係飄飄忽忽，今季話要大翻身、做番正氣球隊喎，小妹今次比較睇好主場烏甸尼斯！（有線足球台61周日凌晨零時直播）
巴勒莫先後賣走阿馬利、巴沙利同薩卡度等主力，其中射手阿馬利上季即使有傷好少上陣，但都入十五球，可見佢重要性，但如今佢走，改由年輕小將卡雲尼代替，小妹就唔多睇好喇！ 巴勒莫新兵尚未磨合 巴勒莫引入新兵中，有國腳級門神艾米利亞、中場利華蘭尼等，雖然都唔錯，但有成七個新球員咁多，磨合期都要一排啦！上場意大利盃第三圈佢主場面對低組別球隊都要失威，今場作客肯定有難啦！
主隊烏甸尼斯變化唔大，只有翼杜辛拿同美斯度離隊。今夏由阿特蘭大羅致校炮手迪桑尼加盟，中場創造力大增，而且烏甸尼斯之前熱身賽又踢得幾積極，小妹當然睇好主隊啦！ |
