今晚英超上演六場「Live Show」，阿仙奴經過聯賽兩場差勁演出後，周中歐聯終於一吐烏氣，大勝荷蘭球隊川迪四比○，「兵工廠」復甦關鍵，正係中場靈魂法比加斯復出。今晚法比仔領銜一眾「槍手」迎戰紐卡素，係時候踢番場好波向球迷交代，主W值得捧場，想博好分頭可捧「讓球主勝」。（now 632周日凌晨零時30分直播）
阿仙奴今季兩場聯賽都未獲好評，開鑼戰險勝西布朗一比○，錯失多次黃金機會，上仗作客富咸，落後一球谷極都谷唔起，最終全失三分。兩場波阿仙奴都控制戰局，而且不乏埋門機會，但球員表現患得患失，明顯信心不足，經過周中歐聯大勝後，相信今仗可賈其餘勇再勝一仗。 復出即勝盡顯卡士 阿仙奴領隊雲格認為，「兵工廠」歐聯表現脫胎換骨，主要原因係法比加斯復出，呢位天才中場雖然年紀輕輕，但已成為阿仙奴進攻靈魂及精神領袖，由於阿仙奴踢法非常倚賴中場入滲，有呢位全能中場壓陣派牌，攻勢流暢好多，法比加斯上仗正選上陣66分鐘，阿仙奴已攻入三球，可見其重要性。 紐卡素殘陣唔襟玩 樂比仔一直認為，奇雲基瑾並非頂級領隊之材，所以今季對紐卡素亦唔會抱太大期望。「喜鵲」現時面對最大問題，就係傷兵甚多，呢個亦係紐卡素近年積弱致命因素。三名攻擊主力維度卡、馬田斯及杜夫今仗均缺陣，而占士米拿亦有意離隊，靠奧雲仔一個前線衝鋒陷陣，實在難有作為。
阿仙奴主場氣勢強勁，上季二十八場主場保持不敗，可見紐卡素爆冷機會唔大，雖然今仗主W得1.38倍，賠率唔多吸引，但阿仙奴近三次主場都可贏紐卡素兩球或以上，進取球迷不妨捧埋「讓球主勝」。 | 
